महिला आयोग सदस्याविना, महायुतीतील तिन्ही पक्षांच्या इच्छुकांची यादी मोठी.

राज्य महिला आयोगाच्या अशासकीय सदस्यांचा कार्यकाळ जानेवारीत संपला असून, आयोगाच्या कार्यभाराला नव्या सदस्यांवरील निर्णय अद्याप मिळालेला नाही. महायुतीत पक्षांतरांसह नव्या सदस्यांच्या निवडीसाठी संघर्षाची शक्यता आहे. राज्य महिला आयोगाच्या अशासकीय सदस्यांचा कार्यकाळ जानेवारी महिन्यात संपुष्टात आला असून, आयोगाचा कार्यभार सध्या या अशासकीय सदस्यांविनाच सुरू आहे. जवळपास महिना उलटला तरी नव्या सदस्यांच्या निवडीचा ‘मुहूर्त’ मिळाला नसल्याने यावरून आता राजकीय वाद पेटण्याची शक्यता निर्माण झाली आहे. गेल्या कार्यकारणीत कार्यरत असलेले सर्व अशासकीय सदस्य हे महाविकास आघाडीमधील होते.

त्यामुळे आता नव्या कार्यकारणीत समावेशासाठी महायुतीत संघर्ष होण्याची शक्यता जाणकारांकडून वर्तविण्यात येत आहे.केंद्राच्या धर्तीवर महाराष्ट्र राज्य महिला आयोगाची स्थापना २५ जानेवारी १९९३ रोजी करण्यात आली आहे. या आयोगात अध्यक्षांसह, सहा अशासकीय सदस्य, एक सदस्य सचिव आणि राज्याचे पोलिस महासंचालक हे आयोगाचे पदसिद्ध सदस्य म्हणून काम पाहत असतात. त्याच वेळी आयोगासाठी सरकारकडून कर्मचाऱ्यांची पदेही मंजूर केली जातात. सध्या राज्याच्या महिला आयोगाच्या अध्यक्षपदी राष्ट्रवादी काँग्रेसच्या रूपाली चाकणकर या काम पाहत आहेत.त्यांची कारकीर्द १५ डिसेंबरला संपुष्टात आली होती. मात्र सरकारकडून त्यांना तीन वर्षांसाठी मुदतवाढ देण्याचा निर्णय घेण्यात आला. त्याशिवाय आयोगाच्या सदस्य सचिव म्हणून काम करणाऱ्या नंदिनी आवडे यांची नियुक्तीही सरकारकडून २३ डिसेंबर २०२४ रोजी करण्यात आली होती. त्यांचीही निवड सरकारच्या पुढील आदेशापर्यंत कायम राहणार असल्याचे जाहीर करण्यात आले होते. दरम्यान, राज्याचे पोलिस महासंचालक हे आयोगाचे पदसिद्ध सदस्य असतात. त्यानुसार रश्मी शुक्ला यादेखील या आयोगाच्या सदस्य म्हणून काम पाहत आहेत.सध्या राज्याच्या महिला आयोगाच्या सहा अशासकीय सदस्यांमध्ये गौरी छाब्रिया, शिवसेना उद्धव बाळासाहेब ठाकरे पक्षाच्या सुप्रदा फातर्पेकर, काँग्रेसच्या माजी सदस्या उत्कर्षा रूपवते, शिवसेनेच्या संगीता चव्हाण, दीपिका चव्हाण आणि आभा पांडे यांचा समावेश होता. या सहाही सदस्यांची नियुक्ती २५ जानेवारी २०२२ रोजी करण्यात आली होती. या सहाही सदस्यांची नियुक्ती २४ जानेवारी २०२५ रोजी संपुष्टात आली आहे.

त्यामुळे सध्या आयोगाचे काम हे सदस्यांविनाच सुरू आहेत. या सदस्यांपैकी जवळपास अनेक सदस्य महाविकास आघाडीमध्ये कार्यरत होते. त्यापैकी काही सदस्य आता महाविकास आघाडीमध्ये नाहीत, त्यांच्या ऐवजी अनेकांनी पक्षांतर केले आहे. त्यामुळे नव्या कार्यकारणीत या सदस्यांपैकी कोणाची वर्णी लागते का, याकडे लक्ष लागून राहिले आहे.सध्या रूपाली चाकणकर या आयोगाच्या अध्यक्षपदी कार्यरत आहेत. २०२४ मध्ये त्यांना तीन वर्षांसाठी मुदतवाढ देण्यात आल्याने सध्या तरी त्यांच्या नियुक्तीला कोणताही धोका नसल्याचे राजकीय वर्तुळात बोलले जात आहे. मात्र, राज्यातील सध्याचे राजकीय वातावरण लक्षात घेता महिला आयोगाच्या सदस्य पदासाठी महायुतीतील तिन्ही पक्षांच्या इच्छुकांची यादी मोठी असल्याचे सांगण्यात येते. त्यामुळे पक्षाकडून कोणत्या सदस्यांच्या गळ्यात ही माळ पडते, हे पाहणे उत्सुकतेचे असणार आहे.