क्रिकेटर बनण्याचं होतं स्वप्न; टॅक्सी चालवून केला उदरनिर्वाह, आज १८० कोटींचा मालक आहे हा सुप्रसिद्ध गायक.

या गायकाने क्रिकेटपटू होण्याचं स्वप्न पाहिलं होतं, मात्र, घडलं काहीतरी वेगळंच अन् तो गायक बनला. जाणून घेऊया या सुप्रसिद्ध गायकाबद्दल.चित्रपट इंडस्ट्री असो किंवा संगीत इंडस्ट्री, येथे नाव कमवणं कोणासाठीही सोपं काम नाही. पण अनेक स्टार्सनी त्यांच्या मेहनतीने संघर्ष करून आपलं स्थान मिळवलं आहे. आज आम्ही तुम्हाला अशाच एका व्यक्तिमत्त्वाबद्दल सांगणार असून तो एक असा गायक आहे ज्याने आपल्या प्रतिभेच्या जोरावर संगीत क्षेत्रात आपला ठसा उमटवला आहे.आपण पाकिस्तानी गायक आतिफ असलम बद्दल बोलत आहोत, जो भारतातही खूप लोकप्रिय आहे. आतिफ असलम एकेकाळी आपला उदरनिर्वाह करण्यासाठी स्थानिक टॅक्सी चालवत असायचा पण आज त्याच्याकडे अफाट संपत्ती आहे.आतिफ असलमने २००५ मध्ये ‘झेहर’ चित्रपटातील ‘वो लम्हे’ या गाण्याने बॉलिवूडमध्ये पदार्पण केलं आणि लगेचच ते हिट झालं.

त्याच्या आवाजाची जादू भारतीय चाहत्यांवर इतकी चांगली चालली की, त्यानंतर त्याला अनेक उत्तम गाण्यांच्या ऑफर मिळाल्या. पण तुम्हाला माहिती आहे का की आजच्या काळात हिंदीतील टॉप गायकांमध्ये गणला जाणारा आतिफ असलमने कधीही गायक होण्याचं स्वप्न पाहिलं नव्हतं, उलट तो क्रिकेटचा चाहता होता आणि त्याला क्रिकेटर व्हायचं होतं.ट्रिब्यूनला दिलेल्या जुन्या मुलाखतीत आतिफ असलमने खुलासा केला होता की, जेव्हा त्याच्या भावाने त्याला नुसरत फतेह अली खान यांच्याशी ओळख करून दिली तेव्हा त्याचं आयुष्य बदललं. नुसरतची गाणी ऐकल्यानंतर, आतिफ देवाच्या अधिक जवळ आला आणि त्याला त्याच्या आवाजात लपलेली प्रतिभा दिसली. यावेळी आतिफ असलमने सांगितलं होतं की, त्याने त्याच्या मोकळ्या वेळेत त्याने स्वखर्चाने लिहिलेलं एक गाणं रेकॉर्ड केलं होतं.

आतिफ म्हणालेला की, ‘मी माझं पहिलं गाणं ‘आदत’ स्वतःच्या खिशातून पैसे खर्च करून रेकॉर्ड केलं. जेव्हा व्हॉट्सअॅपसारखं काहीही नव्हतं, तेव्हा ते इंटरनेटवर अपलोड करण्यासाठी मला काही सेकंद लागायचे. लोकांना ते आवडू लागलं आणि मग मी एक म्युझिक व्हिडिओ बनवला. त्या क्षणापासून माझी कारकीर्द सुरू झाली.’आज आतिफ असलमला कोणत्याही ओळखीची गरज नाही. त्याच्याकडे संपत्तीचीही कमतरता नाही. अनेक माध्यमांच्या रिपोर्टनुसार, त्याच्याकडे १८० कोटी रुपयांची मालमत्ता आहे ज्यामध्ये एक आलिशान बंगला आणि आलिशान गाड्यांचा समावेश आहे. या गायकाने २०१३ मध्ये सारा भरवानासोबत लग्न केलं असून त्याला २ मुलं आणि एक मुलगी आहे.