मारकडवाडीचं लोण आता साताऱ्यातही, ईव्हीएमविरोधात रण तापलं, कोळेवाडीत देशातील पहिला ठराव.

 मारकडवाडी येथील ग्रामस्थांनी ईव्हीएमविरोधात घेतलेल्या भूमिकेनंतर साताऱ्यातील कराड तालुक्यातील कोळेवाडी येथे देशातला पहिला ईव्हीएम विरोधतला ठराव केला आहे. कराड दक्षिण विधानसभा मतदारसंघात हा ठराव करण्यात आला आहे. महाराष्ट्र विधानसभेत महायुतीला भक्कमपणे आपली मुळं रोवता आली याचं सगळ्यात मोठं कारण म्हणजे, विधानसभा निवडणुकीचा भाजपा आणि मित्र पक्षांच्या बाजूने लागलेला निकाल. परंतु या निकालाबाबत संशय निर्माण होण्यासाठीचं एक महत्त्वाचं कारण म्हणजे, महायुती विरोधात निवडणूक लढवणाऱ्या उमेदवारांना त्यांच्या पारंपरिक मतदारसंघात अपेक्षेपेक्षाही खूप कमी मतदान होणं. त्यामुळे ईव्हीएम मशिनच्या बटणांच्या तारा थेट भाजप आणि मित्र पक्षांच्या उमेदवारांच्या नावाशी जोडल्या होत्या का? असा प्रश्न सर्वसामान्य मतदाराच्या मनात अजुनही घों घों करतो आहे. आणि जर खरेच असा प्रकार असेल तर ही फार गंभीर बाब असून भारताच्या लोकशाही तत्त्वाला मारक आहे. त्यामुळे राज्यात ईव्हीएम हटाव देश बचावचा हल्लाबोल विरोधकांकडून केला जात आहे. मारकडवाडी येथील ग्रामस्थांनी ईव्हीएमविरोधात घेतलेल्या भूमिकेनंतर साताऱ्यातील कराड तालुक्यातील कोळेवाडी येथे देशातला पहिला ईव्हीएम विरोधतला ठराव केला आहे. कराड दक्षिण विधानसभा मतदारसंघात हा ठराव करण्यात आला आहे. या मतदारसंघात भाजपाचे डॉ. अतुलबाबा भोसले काँग्रेसचे माजी मुख्यमंत्री पृथ्वीराज चव्हाण यांच्या विरोधात निवडून आमदार झाले आहेत.

याबाबत माहिती अशी की, “ईव्हीएम मशिनवर होणारे मतदान संशयास्पद होत आहे, असे आमचे ठाम मत आहे. त्यावर आमचा विश्वास नाही. त्यामुळे आगामी सर्व निवडणुकीत ईव्हीएम नव्हे, तर बॅलेट पेपरवर मतदान घ्यावे”, अशी मागणी कोळेवाडी ग्रामस्थांनी ग्रामसभेत ठराव घेऊन केली आहे. कोळेवाडी ग्रामस्थांनी ग्रामसभेत घेतलेल्या ठरावाची प्रत प्रसिद्धीसाठी दिली आहे. त्यात म्हटले आहे, की भारतात संसदीय लोकशाही आहे व लोकशाहीत निवडणूक आणि मतदान प्रक्रिया ही संवैधानिक प्रक्रिया आहे. यापूर्वी मतपत्रिकेवर मतदान घेतले जात होते. त्यावेळी आताच्या सारखा मतदानात संशयकल्लोळ कधीच झाला नाही. सध्याचे मतदान, निकाल व त्यावर संशयास्पद मतमतांतरे अशा अनेक बाबी संशयाच्या घेऱ्यात अडकल्याचे दिसत आहे. हे लोकशाहीला मारक आहे. गेल्या काही वर्षांपासून ईव्हीएमवर मतदान प्रक्रिया सुरू आहे. मात्र, अलिकडे देशभरात ईव्हीएमवर मतदान प्रक्रिया संशयाच्या भोवऱ्यात का सापडली आहे?

हा प्रश्न आहे. यासाठी खुल्या मनाने व संशयविरहीत मतदान निकोप लोकशाहीसाठी आवश्यक आहे. सर्वांचा मतपत्रिकेवर होणाऱ्या मतदानावर विश्वास आहे. म्हणून भविष्यात, जरी वेळखाऊ प्रक्रिया असली तरीही पूर्वीप्रमाणे मतपत्रिकेद्वारे निवडणूक प्रक्रिया राबवावी, अशी मागणी या ठरावाद्वारे आम्ही केली असल्याचे ग्रामस्थांनी सांगितले. ईव्हीएमची मतदान प्रक्रिया संशयास्पद का झाली? याबाबत आमच्याही मनात संशय व अनेक शंका आहेतच. विशेषतः सत्ताधारी पक्षाबद्दल सर्वत्र मतदारांमध्ये निराशाजनक वातावरण असताना व समाजमाध्यमांसह मतदारांची होणारी सत्ताविरोधी मानसिकता व संशय लोकशाहीसाठी खूपच धोकादायक वाटतो, असे ग्रामस्थांनी आपले मत व्यक्त करत सांगितले.