खेडमधील पुलाखाली भयंकर दृश्य, गृहराज्यमंत्री योगेश कदम अ‍ॅक्टिव्ह मोडवर, एसपींना महत्त्वाचे आदेश

 खेड शहर ते खाडीपट्टा मार्गावर असलेल्या नवीन देवणे पुलाखाली रविवारी संध्याकाळच्या सुमारास पाच ते सहा गोवंशाचे अवयव आढळून आले रत्नागिरी जिल्ह्यात खेड शहर ते खाडीपट्टा मार्गावर असलेल्या नवीन देवणे पुलाखाली रविवारी सायंकाळी पाच ते सहा गोवंशाचे अवयव आढळून आले. त्यामुळे परिसरात तणावाचे वातावरण निर्माण झाले होते. परंतु गृह राज्यमंत्रिपदाची धुरा हातात घेतलेले नवनिर्वाचित मंत्री योगेश कदम यांनी अॅक्शन मोड घेत तातडीने पोलिसांने आदेश दिले. खेड शहर ते खाडीपट्टा मार्गावर असलेल्या नवीन देवणे पुलाखाली रविवारी संध्याकाळच्या सुमारास पाच ते सहा गोवंशाचे अवयव आढळून आल्यामुळे घटनास्थळी तणाव निर्माण झाला होता. या सगळ्या प्रकरणाची गंभीर दखल जिल्हा पोलीस अधीक्षक धनंजय कुलकर्णी यांनी घेतली. धनंजय कुलकर्णी आणि स्थानिक पोलीस निरीक्षकांची चर्चा झाली.

त्यांनी संशयित आरोपींना तातडीने ताब्यात घ्या आणि या प्रकरणी कसून चौकशी करा, असे आदेश दिले आहेत. या विषयाशी निगडीत असलेल्या कुणाचीही गय करण्यात येणार नाही, अशी प्रतिक्रिया गृह राज्यमंत्री योगेश कदम यांनी दिली आहे.रविवारी सायंकाळी देवणे पुल परिसरात खाडीपट्टा मार्गावर गोवंश हत्येची बातमी पसरल्याने तणाव निर्माण झाला होता. घटनास्थळी पोलिस निरीक्षक नितीन भोयर यांनी पोलिस कर्मचाऱ्यांची जादा कुमक मागवली होती. देवणे पुलाच्या खाली गोवंशाचे जे अवयव सापडले त्यांना पोलिसांनी पंचनामा करून ताब्यात घेतले.यावेळी संतप्त ग्रामस्थांनी संशयित समाजकंटकांना अटक करण्याची मागणी करत रास्ता रोको केला होता. यावेळी शिवसेना तालुका प्रमुख सचिन धाडवे, महेंद्र भोसले, खारी नांदगाव ग्रामपंचायत सरपंच राजेश पालकर यांच्यासह शेकडो ग्रामस्थ घटनास्थळी पोहोचले. यावेळी माध्यमांसोबत बोलताना शिवसेना तालुका प्रमुख सचिन धाडवे यांनी ही घटना निंदनीय असून पोलिसांना उद्या सायंकाळपर्यंत समाजकंटकांना अटक करण्यासाठी आम्ही पोलीसांना अवधी देत असल्याचे सांगितले. त्यानंतर आम्ही स्वतः त्यांना शोधू असा इशारा दिला आहे. त्यामुळे तालुक्यात तणावाचे वातावरण निर्माण झाले.त्यानंतर परिसरात पोलिस बंदोबस्तात वाढ करण्यात आली आहे. या सगळ्या परिस्थितीवर जिल्हा पोलीस अधीक्षक धनंजय कुलकर्णी आणि पोलीस उपविभागीय अधिकारी लक्ष ठेवून आहेत