पंतप्रधान संग्रहालयाचे राहुल गांधींना पत्र! सोनिया गांधींकडे असलेल्या ‘त्या’ पत्रांची केली मागणी

 पंतप्रधान संग्रहालय आणि ग्रंथालयाने काँग्रेस नेते राहुल गांधी यांना पत्र लिहून भारताचे पहिले पंतप्रधान जवाहरलाल नेहरू यांची वैयक्तिक पत्रे परत करण्याची विनंती केली आहे. पंतप्रधान संग्रहालय आणि ग्रंथालय (PMML) ने गांधी कुटुंबाला भारताचे पहिले पंतप्रधान जवाहरलाल नेहरू यांनी लिहिलेली वैयक्तिक पत्रे परत करण्याची औपचारिक विनंती केली आहे. ही पत्रे २००८ मध्ये यूपीए सरकारच्या काळात सोनिया गांधी यांना पाठवण्यात आली होती. 10 डिसेंबर रोजी लिहिलेल्या पत्रात पीएमएमएल चे सदस्य रिझवान कादरी यांनी काँग्रेस नेते राहुल गांधी यांना, सोनिया गांधींकडून मूळ पत्र परत घेण्याची किंवा फोटोकॉपी किंवा डिजिटल प्रती प्रदान करण्याची विनंती केली. या वर्षी सप्टेंबरमध्येही पीएमएमएलने सोनिया गांधी यांना पत्र परत करण्याची विनंती केली होती.

जवाहरलाल नेहरूंनी लिहिलेली ही पत्रे ऐतिहासिक मानली जातात. १९७१ मध्ये जवाहरलाल नेहरू मेमोरिअलने हि पत्रे नेहरू मेमोरियल म्युझियम आणि लायब्ररी (आताचे पीएमएमएल) कडे सुपूर्द केली होती. तथापि, २००८ मध्ये हि पत्रे ५१ पेट्यांमध्ये बंद करून सोनिया गांधींना पाठवण्यात आली होती. या पत्र संग्रहात नेहरू यांनी एडविना माउंटबॅटन, अल्बर्ट आइनस्टाईन, जयप्रकाश नारायण, पद्मजा नायडू, विजया लक्ष्मी पंडित, अरुणा असफ अली, बाबू जगजीवन राम आणि गोविंद बल्लभ पंत यांसारख्या प्रमुख व्यक्तींसोबत केलेल्या पत्रव्यवहाराचा समावेश आहे. पीएमएमएलने गांधी कुटुंबाला लिहीलेल्या आपल्या पत्रात म्हटले आहे की, “ही पत्रे भारतीय इतिहासातील एका महत्त्वाच्या कालखंडाची अमूल्य माहिती देतात”. या कारणास्तव त्यांना संस्थेच्या अभिलेखागारात परत पाठवण्याची मागणी पीएमएमएलने केली आहे. पीएमएमएलने या पत्रात पुढे असे लिहिले आहे की, “या दस्तऐवजांचे ‘नेहरू कुटुंबा’साठी वैयक्तिक महत्त्व आहे. आणि याची आम्हाला जाण आहे. परंतु या ऐतिहासिक साहित्याचा, अभ्यासक आणि संशोधकांना खूप फायदा होईल, असा विश्वास पीएमएलला आहे.” पीएमएमएलने पत्रे परत मागितल्यानंतर भाजपने गांधी कुटुंबावर निशाणा साधला आहे. भाजपचे आयटी सेलचे प्रभारी अमित मालवीय यांनी सोशल मीडियावर लिहिले, “मला विशेषतः मनोरंजक वाटते, ते म्हणजे नेहरूजींनी एडविना माउंटबॅटन यांना लिहिलेल्या पत्रात असे काय आहे जे लपवले जात आहे? काय राहुल गांधी ही पत्रे पुन्हा मिळवण्यासाठी कारवाई करतील?