शपथविधीची वेळ दुपारी चार वाजता होती. मात्र, हा सोहळा ४० मिनिटे उशिरा सुरु झाला. परिणामी, सूर्यास्तावेळी राष्ट्रध्वज अर्ध्यावर उतरवताना शपथविधीचा सोहळा काही मिनिटांसाठी थांबवावा लागला होता. गेली काही वर्षे सत्तेबाहेर असलेल्या माजी मंत्र्यांना मुख्यमंत्री देवेंद्र फडणवीस यांनी मंत्रिमंडळात संधी देत त्यांचे सत्तेत पुनरागमन केले आहे. यामध्ये पंकजा मुंडे, गणेश नाईक, संजय सावकारे, जयकुमार रावल, अशोक उइके, आशिष शेलार यांचा समावेश आहे. तर, छगन भुजबळ, दिलीप वळसे पाटील, सुधीर मुनगंटीवार, रवींद्र चव्हाण, विजयकुमार गावित, तानाजी सावंत, अब्दुल सत्तार यांचे पत्ते कापले. खातेवाटप दोन दिवसांनी होणार असल्याचे मुख्यमंत्री देवेंद्र फडणवीस यांनी स्पष्ट केले आहे. उपराजधानीतील राजभवनाच्या हिरवळीवर रविवारी मावळतीच्या उन्हात रंगलेल्या शपथविधी सोहळ्याला मुख्यमंत्री देवेंद्र फडणवीस, उपमुख्यमंत्री एकनाथ शिंदे, अजित पवार यांच्यासह मंत्र्यांचे आप्तस्वकीय आणि समर्थक मोठ्या संख्येने उपस्थित होते. केंद्रीय मंत्री नितीन गडकरी यांची विशेष उपस्थिती होती. पहिली शपथ भाजपचे प्रदेशाध्यक्ष चंद्रशेखर बावनकुळे यांनी घेतली
