महाविकास आघाडी विधानसभेत काही खास कमाल दाखवू शकली नाही. लोकसभेप्रमाणे विधानसभेतही मविआला चांगल्या जागा मिळतील अशी अपेक्षा होती. मात्र, तसं काही झालं नाही. त्यामुळे सध्या मविआतील धुसफूस वाढताना दिसत आहे विधानसभा निवडणुकीत अपयश आल्यानंतर महाविकास आघाडीतील धुसफूस दिवसेंदिवस वाढतच आहे. घटक पक्षांच्या नाराजीने आघाडीला तडे गेले आहेत. समाजवादी पक्षाचे महाराष्ट्राचे अध्यक्ष, आमदार अबू आझमी यांनी तर शनिवारी आघाडीतून बाहेर पडण्याची घोषणा केली. बाबरी मशिदीबाबत शिवसेना (उबाठा) पक्षाच्या आमदाराने सोशल मीडियावर केलेल्या पोस्टमुळे नाराज झालेल्या सपने हा निर्णय घेतला आहे.
‘महाविकास आघाडी धर्मनिरपेक्ष राहणार नसेल, तर आम्हाला एकत्र राहण्यात स्वारस्य नाही. महाविकास आघाडीतून बाहेर पडण्याच्या निर्णयाविषयी आम्ही पक्षनेतृत्वाला कळविले आहे,’ असे आझमी यांनी स्पष्ट केले. महाविकास आघाडीची स्थापना सन २०१९मध्ये झाली. यामध्ये समाजवादी पक्षही सहभागी झाला होता. मानखुर्द शिवाजीनगर मतदारसंघाचे आमदार अबू आझमी आणि भिवंडी पश्चिमचे आमदार रईस शेख यांनी महाविकास आघाडीसोबतच आताची लोकसभा निवडणूक लढवली होती. विधानसभा निवडणुकीत आघाडीची कामगिरी निराशाजनक झाली. तरीही सप आघाडीसोबतच राहणार, असे आझमी यांनी नुकतेच स्पष्ट केले होते. परंतु या एकोप्यात वादाची ठिणगी पडली, ती ‘एक्स’वरील एका पोस्टमुळे. शिवसेना (उबाठा) पक्षाचे विधान परिषदेचे आमदार मिलिंद नार्वेकर यांनी ६ डिसेंबरला ही पोस्ट केली होती. बाबरी मशिद विध्वंसाच्या पार्श्वभूमीवर ‘हे ज्यांनी केले त्यांचा मला अभिमान आहे… वंदनीय शिवसेनाप्रमुख’ असे त्यांनी म्हटले आहे. यावर सपच्या दोन्ही आमदारांनी नाराजी व्यक्त केली.
‘ईव्हीएमच्या मुद्द्याला आमचा पाठिंबा आहे. निवडणुकांमधून ईव्हीएम हटवले पाहिजे, याविषयी दुमत नाही. परंतु, महाविकास आघाडी स्थापन होताना ही एक धर्मनिरपेक्ष आघाडी असल्याचे आम्हाला सांगण्यात आले होते. उद्धव ठाकरे यांच्या पक्षातील आमदार असंवेदनशील पोस्ट करतात. उद्धव यापुढे हिंदुत्वाच्या मार्गावर पुढे जाणार, अशी भूमिका मांडतात. अशा परिस्थितीत सप अशा आघाडीसोबत राहू शकत नाही. आमचा निर्णय आम्ही पक्षनेते अखिलेश यादव यांना कळविला आहे,’ असे आझमी यांनी स्पष्ट केले. विधानसभेच्या शनिवारी झालेल्या विशेष अधिवेशनादरम्यान महाविकास आघाडीच्या नेत्यांनी आमदारकीची शपथ घेणार नसल्याची भूमिका मांडली, परंतु, आझमी आणि रईस शेख या दोघांनीही या भूमिकेपासून फारकत घेत शपथ घेतली. शपथ घेतल्यानंतर आझमी यांनी उपमुख्यमंत्री अजित पवार यांची भेट घेतली. एकीकडे महाविकास आघाडीतून बाहेर पडण्याचा निर्णय घेतला असतानाच पवार यांची भेट घेतल्याने त्याची राजकीय वर्तुळात चर्चा होती. मात्र, ही सदिच्छा असल्याचे आझमी यांनी स्पष्ट केले. पश्चिम बंगालच्या मुख्यमंत्री ममता बॅनर्जी यांनी शुक्रवारी ‘इंडिया’ आघाडीच्या कार्यपद्धतीवर नाराजी व्यक्त केली, तसेच संधी मिळाल्यास आघाडीचे नेतृत्व करण्याचे संकेतही दिले. बंगालच्या मुख्यमंत्रिपदाचा कार्यभार पुढे सुरू ठेवताना, आपण ‘इंडिया’आघाडीच्या नेतृत्वासह दुहेरी जबाबदाऱ्या सांभाळू शकतो, असे तृणमूल काँग्रेसच्या सर्वेसर्वा ममता बॅनर्जी यांनी सांगितले. ‘इंडिया आघाडी मी स्थापन केली होती. आता तिचे व्यवस्थापन करण्याची जबाबदारी आघाडीचे नेतृत्व करणाऱ्यांवर आहे. तिचे व्यवस्थापन ते करू शकत नसतील, तर मी काय करू? मी एवढेच म्हणेन की, सर्वांना बरोबर घेऊन जाण्याची गरज आहे,’ असे ममतांनी बंगाली वृत्तवाहिनीला दिलेल्या मुलाखतीत सांगितले.
‘भाजपविरोधी कणखर शक्ती म्हणून तुम्ही आघाडीची जबाबदारी का घेत नाही,’ असे विचारले असता, बॅनर्जी म्हणाल्या, ‘संधी मिळाल्यास, ही आघाडी सुरळीत चालेल याची काळजी घेईन. मला बंगालच्या बाहेर जायचे नाही, पण मी ते येथून चालवू शकते.’ भाजपचा सामना करण्यासाठी स्थापन केलेल्या ‘इंडिया’मध्ये दोन डझनहून अधिक विरोधी पक्षांचा समावेश आहे. मात्र, अंतर्गत मतभेद आणि समन्वयाच्या अभावामुळे विविध स्तरांतून त्यांना टीकेला सामोरे जावे लागले आहे..
